Nuk ka mjaftuar një ditë e plotë që Komisioni i Disiplinës në FSHF të dilte me një vendim rreth ngjarjeve të ndeshjes Përmeti-Këlcyra ku u dhunua barbarisht gjyqtarai kryesor i takimit. Edhe pse pjesëtarët e Komisionit janë mbledhur që në mëngjesin e ditës së sotme, nëpërmjet një njoftimi në faqen e FSHF-së është bërë e ditur se vendimi zyrtar do të merret vetëm nesër. Shkak për këtë është bërë fakti se ka pamje filmike të reja dhe prova që do të analizohen para se të merret vendimi përfundimtar. Gjithçka duket absurde kur mendon se bëhet fjalë për një ngjarje e cila ka zgjatur vetëm pak minuta.
Por ndoshta vonesa e shpalljes së këtij vendimi është e qëllimshme për t’i dhënë kohë palëve që të mbyllin një pazar, të bëjnë një marrëveshje. Po kush mund të ishte marrëveshja që do të shpëtonte Këlcyrën nga përjashtimi prej kategorisë së dytë të futbollit? Nuhatja të çon tek ajo që pritet të ndodhë në muajin mars, kur do të mbahen zgjedhjet për Presidentin e Federatës Shqiptare të Futbollit.
Sikundër është paralajmëruar, Armando Duka do të kandidojë sërish për këtë post dhe do t’i duhet shumica e votave. Për ekipin e Këlcyrës votën në këtë rast e ka kryebashkiaku Klement Ndoni. Pra, nëse Armando Duka merr garanci se vota e Klement Ndonit për zgjedhjen e Presidentit të FSHF-së do të jetë për të, ekipi i Këlcyrës mund t’i shpëtojë penalizimit për t’u përjashtuar. Sidoqoftë mbetet të presim deri nesër se çfarë do të ndodhë.
©ArgjiroLajm.net
