Nga Europiani i jashtëzakonshëm i Italisë te momentet e tmerrshme të përjetuara nga Eriksen, duke kaluar nëpër tregun e transferimeve. Antonio Conte zbuloi të ardhmen e tij, pas lamtumirës nga Interi. “Do të jetë një vit, në të cilin unë do të përpiqem të studioj, do të shoh futboll dhe do ta shfrytëzoj në mënyrën më të mirë këtë situatë pushiminë, – tha ai për “Radio Anch’io Sport”. – Do ta shfrytëzoj periudhën për të kaluar më shumë kohë me familjen time dhe për të parë futboll, i cili është gjithmonë në zhvillim”.
Më tej, disa fjalë për kombëtaren italiane: “Gjykimi im për Italinë është sigurisht pozitiv, po tregon unitet dhe dëshirë të madhe, kjo paralajmëron gjëra të mira.
Ndërsa midis ekipeve të tjera nuk shoh ndonjë surprizë. Gjithashtu e shoh Gjermaninë si favorite, mund të shkojë deri në fund. Italia ka treguar vazhdimësi dhe meritë të madhe në dëshirën për të bërë mirë dhe për t’i fituar ndeshjet.
Është një nga kandidatet për të shkuar deri në fund të Europianit. Gjëja që më pëlqen më shumë është se loja e saj sjell besim, ekziston një ekuilibër i madh midis fazës sulmuese dhe mbrojtëse. Kjo është gjëja më e rëndësishme kur dëshiron të synosh rezultate të rëndësishme.
Është e rëndësishme që të mos pësosh gol. Duhet të presim ndeshjet më sfiduese, por këto rezultate nuk mund të jenë rastësi”.
Në fund, ish-trajneri zikaltër i shpreh mbështetje Eriksenit: “Ishte e tmerrshme ajo që pashë përmes televizorit. Ishin momente të tmerrshme, që fatkeqësisht i përjetova i vetëm. Diçka vërtet e keqe ndodhi.
Duke e parë me sytë hapur, më goditi thellë, u bëra shumë keq. Tani është e rëndësishme për të që të gjejë qetësinë e duhur me familjen, falë edhe atyre që ndërhynë për ta shpëtuar. Uroj që të jetë i qetë dhe ta shijojë jetën, pastaj do të ketë kohë për të bërë vlerësimin e nevojshëm. Futbolli vjen më vonë”.
E ardhmja e tij, Italia në Europian, drama e Eriksen: Conte flet për gjithçka
Related Posts
