Një situatë e pazakontë është regjistruar të martën në ndeshjen mes Shqipërisë dhe San Marinos. Me sa duket, drejtuesi i një klubi të njohur në Serinë A kishte shkuar të shihte në fushë Elseid Hysajn, por ky i fundit mbeti në pankinë gjatë gjithë ndeshjes, edhe pse trajneri e çoi në nxemje që në pjesën e parë.
Xhovani Sartori, drejtori teknik i Bolonjës, kishte shkuar që të shihte ndeshjen pikërisht për të parë Hysajn pasi klubi në fjalë e cilëson atë si një alternativë të mundshme për firmën. Hysaj është lojtar i lirë dhe mund t’i bashkohet kurdo këtij ekipi nëse gjen gjuhën e përbashkët.
Por trajneri Maran e la rekordmenin e Kombëtares në stol gjatë gjithë ndeshjes, duke mos e aktivizuar. Kështu, Sartori humbi një mundësi të mirë për të parë nga afër gjendjen e tij fizike dhe sportive. Kësisoj, vendimi i trajnerit mund të ketë ndikuar direkt në vendimin e Bolonjës, pasi në Itali raportojnë se klubi po sheh të njëjtën mundësi me Mateo Darmian, i cili është gjithashtu pa ekip.
Tani mbetet të shihet në ditët në vijim se çfarë do të ndodhë, por bëhet e ditur se Bolonja do të vendosë gjatë kësaj jave se cilin prej mbrojtësve do të vendosë nën kontratë dhe do të bëjë pjesë të ekipit që drejtohet nga Rafaele Paladino.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
