Prokurori i Përgjithshëm, Olsian Çela, raportoi para Komisionit të Ligjeve mbi gjendjen e kriminalitetit në vend duke bërë të ditur se Tirana, Durrësi dhe Elbasani për 2019 kanë numrin më të lartë të procedimeve penale. Ai ngriti shqetësimin për mungesën e prokurorëve për shkak të procesit të vettingut, ndërsa propozoi që deri në plotësimin e vendeve vakante të angazhohen oficerë të policisë gjyqësore.
Prokurori i Përgjithshëm, Olsian Çela, në raportin vjetor online para Komisionit të Ligjeve raportoi mbi gjendjen e kriminalitetit në vend, duke theksuar se Tirana, Durrësi dhe Elbasani për 2019 kanë numrin më të lartë të procedimeve penale.
Çela: Edhe në 2019, numrin më të madh të procedimeve e ka të regjistruar prokuroria pranë gjykatës së shkallës së parë në Tiranë me 31.31%, prokuroria pranë gjykatës së shkallës së parë Durrës ka regjistruar 9.18% të totalit të procedimeve, prokuroria pranë gjykatës së shkallës së parë në Elbasan 8.31% të totalit.
Rritjen më të lartë të kriminaliteti për 2019 e ka patur Qarku i Gjirokastres, ndërsa Dibra rezulton të ketë përqindjen më të ulët për çdo 100.000 banorë.
Çela: Përqindjen më të ulët të kriminalitetit për 100 mijë banorë edhe në 2019 e ka qarku Dibër, ndërsa përqindjen më të lartë e ka qarku i Vlorës. Sa i përket tendencës, rritjen më të lartë për 2019 e ka qarku i Gjirokastrës me 15.39%.
Në raportimin e tij, Olsian Çela, bëri me dije se vjedhja e pasurisë dhe pronat vijojnë të jenë problem në vendin tonë.
Për shkak të mungesës së prokurorëve të larguar nga procesi i vettingut, Kryeprokurori propozon si zgjidhje rritje të numrit të oficerëve të policisë gjyqësore.
Çela: Për vitet në vijim do të jetë mjaft e vështirë që nevojat për prokurorë të plotësohen nga prurjet e reja nga shkolla e Magjistraturës. Kjo do të përkthehet në ngarkesë të shtuar të punës në prokurori dhe zvarritje të çështjeve. Duke rritur numrin e oficerëve të plicisë gjyqësore dhe stafit ndihmës më shumë njerëz profesionistë do të jenë në dispozicion të prokurorëve me qëllim kryerjen efikase të hetimeve.
Komisioni i Ligjeve u tregua i hapur për të forcuar rolin e policisë gjyqësore, por kërkoi garanci që brenda kësaj strukture të njerëz të aftë dhe profesionistë.
