Lefter Zhidru, 71-vjeçari që sulmoi me armë Policinë e Shtetit dhe RENEA-t është përcjellë sot për në banesën e fundit, në fshatin Xarrë në Sarandë, ku ishte edhe vendlindja e tij.
Në një ceremoni mortore të vogël për shkak edhe të masave anti-covid, ai është varrosur sipas riteve ortodokse. Asnjëri nga familjarët e pranishëm nuk ka pranuar të flasë për mediat, ndërsa në ceremoni nuk ka qenë i pranishëm djali i tij, megjithëse ishte një nga personat e fundit me të cilët 71-vjeçari kërkoi kontakt, gjatë negociatave me RENEA-n.
Lefter Zhidru u vra dy ditë më parë nga forcat RENEA në lagjen “11 nëntori”, në afërsi të Kthesës së Sarës, në Elbasan, pas 5 orësh negociata. I moshuari dhunoi ish-bashkëshorten dhe vajzën e tij 14-vjeçare, mori armën dhe shkaktoi terror në qytet duke plagosur dy qytetarë që po kalonin rastësisht poshtë banesës së tij, pasi po sulmone me kallashnikovë efektivët e Shqiponjave. Pasi ish-bashkëshortja telefonoi policinë, ai nuk i kursye plumbat as ndaj efektivëve, duke bërë që i gjithë terrori të përfundonte me ekzekutimin e tij, në muzg nga forcat RENEA.
