Karlos Alkaraz foli për qindra gazetarë të ardhur në Nju Jork menjëherë pas përfundimit të ndeshjes. Ai u shfaq me një buzëqeshje në fytyrë, pasi tashmë e ka lënë pas dëmtimin e kyçit të dorës së djathtë, i cili e mbajti jashtë fushave për 139 ditë. Për shkak të orës së vonë të natës, konferenca për shtyp u zhvendos nga salla e zakonshme në një prej korridoreve të mëdha të stadiumit “Arthur Ashe”.
Fituesi i shtatë titujve Grand Slam pranoi se një prej faktorëve vendimtarë të ndeshjes ishte shërbimi i kundërshtarit të tij: “Shelton të ushtron shumë presion gjatë gjithë kohës. Ka pasur momente kur mund të kisha bërë pak më shumë.
Në super ‘tie-break’ isha dy pikë përpara, por ai shërbeu të dytin dhe unë gabova në kthimin e shërbimit. Kush e di, ndoshta nëse ajo pikë do të ishte luajtur ndryshe, mund të kishte ndryshuar edhe ndeshjen”. Ishte pikërisht një ace i amerikanit që i dha fund takimit dhe vulosi fitoren e tij. “Gjatë natës, topi bëhet shumë më i madh për shkak të lagështirës dhe është e vështirë ta kontrollosh.
Kjo e bën ndeshjen edhe më të vështirë. Përballë kisha një Shelton që zhvilloi një ndeshje shumë të plotë, shumë të pjekur dhe që e dinte në çdo moment se çfarë duhej të bënte. Fizikisht është një bishë, dukej sikur nuk kishte asnjë dobësi”, deklaroi numri tre i botës. “Pas setit të tretë, gjeta mënyrën për t’u rikthyer në ndeshje. U mbështeta te publiku, mora zemër dhe u ngrita emocionalisht, dhe mendoj se ia dola ta bëja këtë deri në pikën e fundit”, përfundoi tenisti spanjoll.
