Vijojnë lëvizjet në Policinë e Shtetit në kuadër të intensifikimit të luftës ndaj krimit e drogës. Sot janë firmosur disa lëvizje në Tiranë dhe disa qarqe nga Drejtori i Përgjithshëm i Policisë së Shtetit, Ardi Veliu. Sa i përket Gjirokastrës, pas Koco Dafës që rikonfirmohet në detyrën e zv.drejtorit të policisë së qarkut, vjen edhe një zv.drejtor tjetër. Ai është Bajram Mara, i cili deri më tani ka qenë zv.drejtor policie në Durrës. Muajin e kaluar ministri Fatmir Xhafa i dha ‘OK’ strukturës së re të Policisë së Shtetit, të propozuar nga Ardi Veliu.
Sipas strukturës se re çdo drejtori vendore do të ketë drejtor dhe 2 nëndrejtorë ku njeri do të mbuloje hetimin e krimeve, ndërsa tjetri çështjet e rendit dhe sigurisë publike. Disa prej sektorëve ekzistues do të shkrihen ose do të bashkohen në një sektor të vetëm në mënyrë të tille që të ulet numri i punonjësve në nivel drejtues. Do të shkrihen 3 sektorët e hetimit dhe krijohet sektori i vetëm që do të mbulojë çështjet e drogës trafiqeve të paligjshme dhe krimit ekonomik që më parë ishin të ndarë.
Do të zgjerohet kompetenca e komisariateve të cilët do të merren edhe me veprën penale të vrasjes e cila më parë u kalonte drejtorive. Territori i një komisariati do të ndahet në zona policore ku do të rritet roli i inspektorit te zonës. Ndryshime do të ketë dhe Policinë Rrugore, e cili do të ketë në varësi seksionet e policisë rrugore. Ato nuk do kenë varësi nga komisariatet siç ishte më parë.
© ArgjiroLajm.net