Eurovision Song Contest 2026 nis zyrtarisht më 12 maj në Vjenë, në sallën “Wiener Stadthalle”, duke shënuar edicionin e 70-të të një prej spektakleve muzikore më të ndjekura në botë. Në garë marrin pjesë 35 shtete, të ndara në dy gjysmëfinale, ndërsa finalja e madhe do të mbahet më 16 maj.
Gjysmëfinalja e parë zhvillohet më 12 maj me 15 vende pjesëmarrëse, nga të cilat vetëm 10 do të sigurojnë kualifikimin për në finale. Në këtë fazë përfshihen edhe Shqipëria, Serbia, Portugalia, Australia dhe disa shtete të tjera europiane dhe jashtë saj. Shqipëria përfaqësohet nga këngëtari Alis me këngën “Nan”, duke sjellë një tjetër prezantim në skenën evropiane.
Automatikisht në finale kalojnë Austria si vend mikpritës, si dhe “Big Five”: Franca, Gjermania, Italia, Spanja dhe Mbretëria e Bashkuar.
Sipas parashikimeve të para, Finlanda shihet si favoritja kryesore për fitore, me Linda Lampenius dhe Pete Parkkonen dhe këngën “Liekinheitin”, ndërsa pas saj renditen Greqia, Danimarka, Franca dhe Australia.
Edhe këtë vit Eurovisioni nuk është pa polemika. Pjesëmarrja e Izraelit ka nxitur debate dhe thirrje për bojkot nga disa vende, duke shtuar tension politik në një event që tradicionalisht fokusohet te muzika dhe argëtimi.
Organizatorët kanë rritur masat e sigurisë dhe protokollet e hyrjes, ndërsa ceremonia “Turquoise Carpet” është mbajtur një ditë para nisjes së garës, duke hapur zyrtarisht javën e Eurovisionit në Vjenë.
