Për herë të parë pas 28 vitesh, një nga rregullat më të rrepta të Eurovisionit do të thyhet në finalen e këtij viti falë përfaqësuesve të Finlandës.
Violinistja e njohur Linda Lampenius ka marrë një përjashtim të veçantë nga organizatorët e Eurovisionit për të luajtur violinën drejtpërdrejt në skenë, diçka që nuk lejohej prej dekadash. Sipas rregullave të konkursit, të gjithë artistët duhet të këndojnë live, ndërsa muzika instrumentale zakonisht transmetohet e regjistruar paraprakisht për të shmangur problemet teknike dhe për të garantuar ndryshime të shpejta mes performancave.
Kjo do të thotë se instrumentet që shihen shpesh në skenën e Eurovisionit përdoren kryesisht si element vizual i performancës dhe jo për interpretim real. Megjithatë, këtë vit organizatorët kanë bërë një përjashtim të rrallë për Finlandën.
Linda Lampenius do të performojë live me violinë gjatë interpretimit të këngës “Liekinheitin”, së bashku me këngëtarin Pete Parkkonen. Sipas mediave të huaja, violinës i është dhënë një rol kyç në performancën e këngës, ndaj organizatorët kanë vendosur të lejojnë interpretimin e drejtpërdrejtë të instrumentit.
Finalja e madhe e Eurovisionit do të mbahet më 16 maj në Vjenë, ku 25 shtete do të ngjiten në skenë për të konkurruar për trofeun e këtij viti. Ndërkohë, performanca e Finlandës pritet të jetë një nga momentet më të komentuara të natës.
