Në një botë paralele, larg Shqipërisë, Everton, një skuadër pa asnjë objektiv, ndal Man.City, frenon ekipin e Pep Guardiola-s duke larguar “qytetarët” nga gara për titull, një “X” që u festua gjatë në Londër, në radhët e Arsenal. Ekipi i Artetas merr një asist të rëndësishëm, me “topçinjtë” që 3 javë përpara fundit të sezonit e shohin veten në kuotën e 76 pikëve, 5 më shumë se Man.City, Ekipi i Guardiola-s ka një ndeshje më shumë në dispozicion, por Arsenal ka në dorë fatet e titullit, mjafton të fitojnë 3 ndeshjet e fundit pa kthyer kokën pas, pa parë se çfarë bën Man.City.
Doku hapi siparin me një gol fantastik në minutën e 43, me një goditje perfekte që u ndal në trekëndësh. Në fraksionin e dytë, historia e këtij takimi ndryshoi totalisht, me Everton që mori kontrollin e lojës. Në minutën e 68-të, Barry përfitoi nga një gafë e Man.City në mbrojtje, mposhti dhe Donnarumma-n duke barazuar shifrat në 1-1. Everton nuk u mjaftua me kaq, por në minutën 73-të, gjatë zhvillimeve të një goditje këndi, O’Brien me kokë bëri që stadiumi të shpërthente në festë.
Në aksionin pasues, Kovacic shpiku një asist fantastik për Erling Haaland, me biondin që finalizoi plot klas duke barazuar shifrat në 2-2. Pep Guardiola nuk i besonte syve nga pankina ku në minutën e 81-të sërish Barry, i pa mbuluar në zonë e kishte të lehtë të shtynte topin në rrjetë duke rikthyer edhe një herë Everton në avantazh. Man.City nuk u dorëzua, besoi deri në fund dhe në limite të shtesës, në frymën e fundit, Doku sërish me një goditje fantastike barazoi rezultatin në 3-3 duke shmangur humbjen e Man.City.
Pas këtij “X”, Pep Guardiola e pranon se tani asgjë nuk është më në dorën e tyre: “Tani asgjë nuk është në duart tona, përpara kësaj ndeshje ishte, por tani jo. Kemi edhe 4 ndeshje në dispozicion, e radhës është kundër Brentford, të shohim se çfarë do të ndodhë, ndeshjet janë të ngjashme pasi të gjithë konkurrentët janë të mirë, por ne futemi në fushë me besim”, u shpreh Pep Guardiola.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
