Gazetari Blendi Fevziu ka bërë një tjetër reagim lidhur me mbarëvajtjen e sezonit turistik në Shqipëri. “Propagandën më të keqe të turizmit po e bëjnë vetë njerëzit e turizmit”, thotë Fevziu përmes një video të gjatë të publikuar në kanalin e tij në YouTube.
“Sabotim është të mbash çmime stratosferike. Nuk është propagandë kundër turizmit të thuash që çmimet janë shtrenjtë. Nuk është propagandë të thuash që në Shqipëri është e zënë çdo centimetër katror të plazheve të Shqipërisë dhe të nxjerrësh truprojat që të kontrollojnë çantat dhe termusët e pushuesve”, thotë Fevziu.
Më tej gazetari tregon rastin e një emigranti shqiptar, i cili vitin e kaluar kishte bërë pushime në Dhërmi duke paguar 3500 paund, katër persona për një javë. Ndërsa këtë vit, në të njëjtin hotel e me të njëjtën dhomë i kishin kërkuar 4 mijë paund më shumë.
“Propagandë është ta fshehësh të vërtetën përmes spekulimit. Sot imazhi i Shqipërisë është dëmtuar shumë nga shezlonget. Jemi shndërruar në një republikë shezlongesh”, shprehet Fevziu. Ndiqni më poshtë rrëfimin e plotë të tij. ©Argjiroja.net
