Komisioni disiplinor i Federatës Ndërkombëtare të Futbollit (FIFA) ndëshkoi Federatën Kroate të Futbollit (HNS), Federatën e Futbollit të Serbisë (FSS) dhe Federatën e Futbollit të Arabisë Saudite.
Kroatët u gjobitën me 50 mijë franga zvicerane për sjelljen e disa tifozëve në ndeshjen e Kupës së Botës në Katar kundër Kanadasë. Një pjesë e tifozëve kroatë në atë ndeshje kanë fyer portierin kanadez Milan Borjan.
“HNS është gjobitur me 50,000 franga zvicerane për shkelje të nenit 16 të Kodit Disiplinor të FIFA-s (përdorimi i fjalëve dhe objekteve për të përcjellë një mesazh jo të përshtatshëm për një ngjarje sportive) në lidhje me sjelljen e tifozëve kroatë gjatë ndeshjes kundër Kanadasë”, FIFA.
Serbia u gjobit me 20,000 franga për “shkelje të nenit 11 të Kodit Disiplinor të FIFA-s dhe nenit 4 të Rregullores së Kupës së Botës FIFA 2022 në lidhje me flamurin e shfaqur në dhomën e zhveshjes pas ndeshjes kundër Brazilit”.
Pas ndeshjes kundër Brazilit, në dhomën e zhveshjes që përdor kombëtarja e Serbisë, është varur një flamur me hartën e Kosovës të pikturuar me ngjyrat e flamurit serb, me sloganin: “Jo dorëzim”.
Federata e Futbollit të Arabisë Saudite është gjobitur me dy gjoba nga 15,000 franga secila për sjellje të pahijshme nga lojtarët që kanë marrë gjashtë kartonë të verdhë gjatë ndeshjeve kundër Argjentinës dhe Meksikës.
