Takimi që u zhvillua në sallën e Parlamentit për zonat rurale, dhe problemet e këtyre zonave, pikasi me fjalimin e një vajze nga Dibra.
Rrallë herë ndodh që Kuvendi i Shqipërisë të shpërthejë në duartrokitje të vazhdueshme.
Vajza ka treguar para disa deputetëve, specialistëve dhe zyrtarëve që e kanë punën të lidhur drejtpërdrejtë me zonat rurale, vështirësitë që hasin femrat në këto zona.
Ajo ka treguar mes lotëve mungesën e rrugëve apo ujit, duke kërkuar ndihmë nga shteti për t’u zhvilluar.
“Duhet të vini te stallat atje, jo unë të vij këtu në Kuvend.
Unë jam aty, nuk shkoj asgjëkundi pres, nuk qëndroj kot, punoj, por pres.
Ejani të shikoni, ejani atje, në doni ushqim buke e zemër, ushqime bio, ejani në fshat, ju lutem gjithsecilit të mos vini me makinë të vogël, ejani me fuoristradë, se atje nuk shkon makina, nuk shkon makina”- ka thënë ajo mes lotësh.
Fjala e saj është ndërprerë vazhdimisht, jo vetëm se ajo përlotej dhe fshinte lotët me shami, por edhe sepse të pranishmit në atë sallë si rrallë herë shpërthyen në duartrokitje mbështetëse.
“Fshatrat e strukur nuk kanë rrugë, jepini ujë dhe rrugë fshatit dhe zhvillim, nuk kërkojmë asgjë tjetër”- tha ajo.
