Format i ri, garë dinamike & më shumë emocione – Balkanweb.com

Sezoni i ri i “Abissnet Superiore” është gati të nisë, me ndeshjen Vllaznia–Skënderbeu që do të çelë zyrtarisht kampionatin ditën e premte, në orën 21:00, në stadiumin “Loro Boriçi”. Në prag të startit të sezonit 2026–2027, Drejtori i Garave në Federatën Shqiptare të Futbollit, Marjus Sulejmani, ka folur për fshf.org, duke prezantuar risitë e kampionatit, formatin e ri të garës dhe pritshmëritë për një sezon sa më të bukur sportiv.

Sulejmani është ndalur fillimisht te starti i kampionatit dhe ceremonia tradicionale e hapjes, e cila këtë vit do të zhvillohet në shtëpinë e kampionëve në fuqi, Egnatias.

“Kampionati nis ditën e premte. Ndeshja e parë që do të zhvillohet është Vllaznia – Skënderbeu, në orën 21:00. Gjithashtu ditën e shtunë, do të luhen dy ndeshje dhe dy takimet e tjera do të zhvillohen ditën e diel. Si çdo vit ceremonia e hapjes organizohet te ekipi kampion, ku këtë sezon është Egnatia dhe në ndeshjen Egnatia – Tirana, e planifikuar ditën e diel, do të bëhet ceremonia e hapjes së kampionatit”, – tha Marjus Sulejmani.

Drejtori i Garave në FSHF ka shpjeguar edhe ndryshimet që sjell sezoni i ri, me një format të ri të kampionatit pas përfundimit të fazave të rregullta.

“Risitë janë të shumta. Këtë sezon kemi ndryshim të formatit të garës, ku pas tre fazave të rregullta, ekipet do të ndahen në dy faza: play-off ku do të garojnë gjashtë ekipet e para për shpalljen e ekipit kampion dhe katër ekipet e tjera që janë të renditura nga vendi i shtatë në vendin e dhjetë që do të marrin pjesë në fazën play-out.

Siç e dini ekipet do të aktivizojnë lojtarë me pasaportë shqiptare të datëlindjes 2007 e në vijim ku në “Abissnet Superiore” rregulli është i tillë, ku ekipet do të duhet ta nisin ndeshjen me një lojtarë minimalisht të datëlindjes 2007 që do të duhet të aktivizohet një pjesë loje. Ndërsa përsa i përket kategorive të tjera, të parë, dytë dhe të tretë ky rregull është që ekipet do të duhet të aktivizojnë lojtarë të datëlindjes 2007 me pasaportë shqiptare gjatë gjithë ndeshjes”, – tha Marjus Sulejmani.

Duke folur për formatin e ri të kampionatit, Marjus Sulejmani thekson se gara do të jetë dinamike dhe shpreh urimin për një sezon me sa më shumë tifozë, spektakël dhe fair-play në fushë dhe në tribuna.

“Struktura e kampionatit është e tillë ku skema është shumë dinamike. Urojmë që të kemi sa më shumë tifozë, sa më shumë spektakël, sa më shumë fair-play si në fushë dhe në tribuna”, – tha Marjus Sulejmani.

Drejtori i Garave në FSHF ka vlerësuar gjithashtu paraqitjen e skuadrave shqiptare në kompeticionet europiane, duke u uruar suksese Egnatias dhe Dinamo City në sfidat e tyre të radhës.

“Këtë sezon kemi një përfaqësim shumë dinjitoz të Egnatias, që ka siguruar tashmë fazën e ligës në UEFA Conference League, por është akoma në garë për të marrë pjesë në Europa League, ku ndeshja e parë do të luhet më 20 gusht dhe takimi i kthimit më 27 gusht.

Gjithashtu, Dinamo City më 20 gusht ka ndeshjen e parë të play-off-it ndaj Pafos, që do të zhvillohet në “Elbasan Arena”, ndërsa ndeshja e kthimit më 27 gusht. Urojmë që të dyja ekipet si Egnatia dhe Dinamo City të kualifikohen, ku tashmë Egnatia ka siguruar fazën e ligës në Conference League, urojmë që të shkojë në Europa League. Gjithashtu, shumë suksese Dinamos që në ndeshjen e play-off-it të kualifikohet në fazën e ligës së Conference League”, – tha Marjus Sulejmani.