Vizita e presidentit Ilir Meta sot në Gjirokastër, shërbeu edhe si një rast për të afirmuar sërish aleancën PD-LSI. Deputeti i PD-së, Tritan Shehu qëndronte pranë kryebashkiakes Zamira Rami. Aty afër ishte edhe deputeti Vangjel Tavo. Pak më tej kreu i PD Gjirokastër, Roland Bejko bashkë me disa këshilltarë demokratë. Prania e të gjithëve aty bashkë nuk ishte thjesht për shkak të protokollit apo në respekt të institucionit të Presidentit të Republikës. Në Këshillin Bashkiak të Gjirokastrës ka kohë që PD dhe LSI kanë koordinuar veprimet.
Pasi krijuan një shumicë të brishtë shkarkuan kryetarin e këshillit, Roland Karalli për të zgjedhur Mimoza Comon. Më pas tentuan për shkarkimin e sekretarit të këshillit. Nga tjetër Zamira Rami emëroi si administrator të Lazaratit kreun e PD-së në këtë fshat. Asnjë nga radhët e njerëzve të PD në Gjirokastër nuk artikulon më akuza ndaj kryebashkiakes apo ndaj deputetit Tavo. PD e konsideronte më parë Zamira Ramin si një kukull në duart e Vangjel Tavos. Sot gjërat kanë ndryshuar, PD-LSI do të shkojnë bashkë në zgjedhje.
Cilido qoftë kandidati i opozitës, ai do të shkaktojë jo pak debate. PD nga njëra anë kërkon kandidat të vet për Gjirokastrën, ndërsa Zamira Rami kërkon mandat të dytë. Mbetet të shohim se kush do të hapë rrugë i pari; Tërhiqet PD dhe mbështet Zamira Ramin apo tërhiqet LSI dhe mbështet një kandidat të propozuar nga PD? Ose Zamira Rami ‘kapërcen’ te PS. Asgjë nuk është e pamundur!
©ArgjiroLajm.net
