FSHF merr vendimin/ Ja ku do të luhet finalja e Kupës Skënderbeu-Vllaznia

Finalja e Kupës së Shqipërisë mes Skënderbeut dhe Vllaznisë do të zhvillohet me 30 maj në stadiumin ‘Air Albania’ në orën 19:00.
Vendimi është marrë nga Departamenti i Garave në FSHF që me short përcaktoi se pritës do jenë korçarët.
Njoftimi i FSHF-së.
KF Skënderbeu – KF Vllaznia është finalja e madhe e vlefshme për kompeticionin e Kupës së Shqipërisë, që do të zhvillohet më 30 maj në stadiumin “Air Albania”, duke nisur nga ora 19:00.
Këtë të martë, Departamenti i Garave në FSHF hodhi shortin, që përcaktoi edhe KF Skënderbeun si skuadrën pritëse dhe KF Vllazninë si skuadrën mike për këtë finale të madhe.
Korçarët kaluan në finalen e Kupës pas fitores ndaj KF Teutës në qytetin bregdetar, ku mundën “Djemtë e Detit” me rezultatin 0-2, me gola të Meksit dhe Elvi Berishës.
Ndërkaq, shkodranët fituan në “Loro Boriçi” ndaj KF Laçit, një ndeshje që dhuroi shumë emocione, por vetëm një gol, të shënuar nga Ardit Hoxhaj, i cili i dha biletën për në finale shkodranëve.
Kjo është hera e dytë në historine e këtij kompeticioni që këto dy ekipe përballen me njëra-tjetrën. Hera e parë kur këto ekipe janë përballur me njëra-tjetrën ka qenë në vitin 1965, ndeshje e fituar nga KF Vllaznia, me rezultatin 1-0.