Nga Brikena Metaj
“62% e studentëve që vinin nga universiteti i Gjirokastrës rezultuan mbetës në provimin e shtetit të vitit 2017”. Pohimi ka ardhur nga vetë ministrja e arsimit Lindita Nikolla, ndërsa ka komentuar mbylljen e programeve të mësuesisë në disa universitete ku sërish kryeson Gjirokastra.
Duket se tashmë vendimi është marrë: “Më mirë pa mësues, sesa më mësues të dobët”. Ky është mesazhi që unë lexoj në pohimet e krerëve të shtetit mbi situatën e zero studentëve në degët e mësuesisë. Dhe nuk mund të them se nuk jam dakord, sado e dhimbshme të tingëllojë. Kishte ardhur koha t’i jepej fund kësaj armate mësuesish pa njohuri arsimore, didaktike e shpesh edhe intelektuale.
Të gjithë ne që sot jemi prindër kemi ndeshur në rrugën tonë atë mësuesen që korrigjon gabim detyrat e fëmijës, atë mësuesen që nuk është e aftë të transmetojë në mënyrën e duhur dijet, atë mësuesen që orën e mësimit e shpërdoron me muhabete kot dhe nëse fëmija mbetet i pasqaruar ka vetëm një përgjigje: “Shpjegova njëherë, ku e kishe mendjen”.
Universiteti është një ndër asetet më të çmuara që ka Gjirokastra, i vetmi institucion arsimor, shkencor e kulturor në Rajonin Jugor. Por prej vitesh tashmë e ka humbur thelbin e madhështisë së vet duke u kthyer në atë depon ku hedhim çdo gjë që nuk na hyn në punë për momentin.
Dhe ashtu si vijnë në këtë universitet, pjesa më e madhe e këtyre studentëve, ashtu vendosin të dalin, pa i hapur librat asnjëherë, pa shkelur në bibliotekën që ndryshe nga 18 vite më parë, ka kondicioner dhe shumëllojshmëri titujsh.
E më pas, ndërsa marrin diplomën kërkojnë një punë në shtet, zëvendësojnë atë mësuesen që del në pension, zënë vendin e punës prej nga nuk i heq dot askush edhe nëse rezultojnë dobët në kontrolle, ndërsa prindi i nxënësve të kësaj mësueseje të re, pasdite çon fëmijën te ajo mësuesja që sapo doli në pension.
Epo, tashmë ka ardhur koha të themi “Mjaft më”. Le të mbyllen universitetet, nëse nuk janë në gjendje të realizojnë qëllimin e tyre, këto bankomate parazitare që shpërndajnë diploma për tufa të tëra injorantësh e dembelësh që më pas helmojnë me paaftësinë e tyre një sistem të tërë arsimor e breza të tërë nxënësish.
Kam patur fatin që si ish-studente e këtij universiteti të kem patur si udhëheqës disa prej pedagogëve më të mirë në vend si Valter Memisha, Republika Çulli, Viron Graçi, Thoma Dhima, Tasim Gjokutaj etj. U jam mirënjohëse vërtet, ka qenë nder për mua e të gjithë studentët e brezit tim besoj!
