PD dhe LSI janë tashmë në një koalicion opozitar, fakt ky që vërehet edhe në nivel vendor. Sot në mbledhjen e Këshillit Bashkiak Gjirokastër këshilltarët e këtyre dy partive janë bërë bashkë, duke nënshkruar një peticion me anë të të cilit i kërkojnë qeverisë shqiptare të shpallë gjendjen e jashtëzakonshme në Bashkinë Gjirokastër dhe të marrë përsipër menaxhimin e situatës. Sipas këshilltarëve të PD-së dhe LSI-së, situata në Gjirokastër është kritike për shkak të rrëshqitjes së tokës. Ky veprim i sotëm i këshilltarëve të dy partive opozitare pason kërkesën e para dy javëve të kryebashkiakes Zamira Rami, e cila i kërkoi qeverisë shpalljen e gjendjes së emergjencës së pjesshme në Gjirokastër, kërkesë e cila u refuzua. Por gjasat janë që edhe ky peticion i këshilltarëve të PD-LSI të të mos merret parasysh. Ata janë të vetëdijshë për këtë, por peticioni i tyre vlen më shumë nga pikëpamja simbolike si akt politik i opozitës së dalë pas zgjedhjeve të 25 qershorit.
©ArgjiroLajm.net
