Luftëtari e nisi me shumë probleme këtë sezon të ri, ndërsa nga klubi u larguan disa futbollistë. Kështu, grupi i lojtarëve të sezonit të kaluar ka pësuar ndryshime të mëdha, ndërsa pas eksperiencës së shkurtër në krye të trajnerit Klevis Dalipi, tashmë gjirokastritët drejtohen nga Klodian Duro.
Ndërkaq, në ditët e fundit, bluzinjtë janë treguar një nga skuadrat më aktive në merkato, ndërsa kanë afruar shumë lojtarë, mes tyre edhe ish-sulmuesin e Tiranës, Mario Morina. Ndërsa, në linjën e ofensivës është transferuar edhe Angelmo Vyent, i cili në të kaluarën ka qenë pjesë edhe e gjigandëve të Fejnord.
Megjithatë, një lojtar i rëndësishëm për gjirokastritët prite të mbërrijë në ditët e fundit të merkatos teksa marrëveshja duket pranë. Bëhet fjalë për një lojtar i cili do të huazohet nga skuadra e AEK-ut, teksa emri është ende një sekret. Mesa duket, trajneri Duro mund të ketë në dispozicion një armë më shumë për të siguruar objektivat e sezonit./Vipsport.al
