Me kampionët në fuqi të Skënderbeut, me të cilët u bashkua në verë, Realdo Fili nuk mundi të gjente hapësirat e nevojshme, edhe pse nga korçarët pati largime titullarësh.
Futbollisti fierak është aktivizuar në pak ndeshje si titullar nga trajneri Shehi dhe në disa të tjera si zëvendësues, ndaj dhe është ndarë me klubin për të gjetur një ekip, ku mund të ketë një aktivizim të rregullt.
Emri i Realdo Filit ka dalë në Gjirokastër, ku ai mund të luante më shumë, por ende nuk bëhet fjalë për diçka zyrtare. Trajneri Gentian Mezani do t’i bënte punë një lojtar si Fili, me përvojë në Superiore, ku ka veshur edhe fanellat e Apolonisë, Partizanit dhe Kamzës.
Mbetet të shihet, nëse Fili do të shkojë në Gjirokastër, apo në një skuadër tjetër. Aventura korçare për të është mbyllur.
