Shumë nga rrugët e fshatrave të Gjirokastrës janë tërësisht të shkatërruara. Gjendjen e ka vështirësuar edhe më tej ngrica e dimrit të sivjetshëm, e cila i ka dëmtuar edhe më shumë. Bëhet fjalë për rrugët që lidhin fshatrat me qytetin e Gjirokastrës, me njëri-tjetrin dhe për rrugët e brendshme.
Banorët e fshatit Arshi Lengo janë vetëm disa nga mijëra banorët që vuajnë përditë për shkak të rrugëve të dëmtuara. Ata kërkojnë investime.
“Jemi mbuluar nga gropat dhe balta, ndërkohë që përmbytemi nga shiu gjithnjë, sepse ne nuk kemi as kanalizime”, tregon Kamber Shehu, banor i këtij fshati. Të njëjtin shqetësim kanë edhe banorët e fshatit Mashkullorë, sidomos ata që jetojnë në pjesën e sipërme. “Rruga që lidh lagjen tonë me pjesën tjetër të fshatit është e mbuluar nga gropat dhe e bën të pamundur lëvizjen e makinave. Mezi shesim prodhimet tona blegtorale. Më vështirë e kemi në rastet e e urgjencave mjekësore apo zjarreve, se ambulancat dhe zjarrfikëset e kanë të pamundur të lëvizin në këtë pjesë të fshati”, thotë njëri prej banorëve, Ymer Alikaj, banor i Mashkullorës.
Shqetësime për gjendjen e rënduar të rrugëve kanë ngritur vazhdimisht edhe banorët e fshatrave Kolonjë dhe Golem. Të gjithë këto fshatra i kanë kërkuar zyrtarisht bashkisë së Gjirokastrës ndërhyrje me investime.
I pyetur nga Konica.al, nënkryetari i Bashkisë Gjirokastër, Vangjel Muço, pranon se gjendja është e vështirë. Sipas tij, me ndarjen e re territoriale, bashkia mori në dorëzim një rrjet të dëmtuar rrugor nga ish komunat. “Për shkak të vendodhjes gjeografike të Gjirokastrës, pjesa më e madhe e rrugëve shtrihen në zonat malore si Fushërbardhë, Kardhiq, Cepo, etj. Në këto segmente prej vitesh nuk ishin kryer investime madhore, ndërkohë që është punuar vetëm për mirëmbajtien e tyre”. Aktualisht bashkia administron rreth 80 kilometra rrugë rurale. “Gjendja e tyre e rëndë, pamundësia për lëvizjen e mjeteve, kërkon investime të mëdha. Përgjatë dimrit që lamë pas, ne u kujdesëm për mirëmbajtien e rrugëve rurale dhe sidomos atyre që përshkojnë zonat malore. Me fondet që kemi, bashkia nuk mund të përballojë investime madhore”, shprehet Muço.
Sipas tij, në disa raste është dashur ndërhyrja e mjeteve të ushtrisë për mirëmbajtjen e rrugëve të fshatrave. Por si do të jetë e ardhmja? Në buxhetin e këtij vitit, bashkia me të ardhurat e saj ka parashikuar disa investime në segmentet rrugore të njësive administrative dhe fshatarave, dhe tani po rehabilitohet segmenti rrugor Picar-Kolonjë dhe ai Dhoksat-Qesorat. Bashkia ka dorëzuar pranë qeverisë qendrore edhe disa projekte të tjera për marrjen e financimeve në lidhje me rikonstuksiosnin e rrugëve që lidhin njësitë administrative me qendrën. Zbatimi i këtyre projekteve synon të lehtësojë jo vetëm qarkullimin normal të mjeteve në fshatrat e Gjirokastrës por të ndikojë edhe në zhvillimin ekonomik të këtyre zonave./konica.al
