Për punën që ka bërë gjatë sezonit të fundit, meriton të qëndrojë në krye të Luftëtarit sa më gjatë. Trajnerit Hasan Lika i ka përfunduar kontrata me ekipin gjirokastrit, që për herë të parë në histori do të marrë pjesë në Europa League. Jo vetëm që nuk është konfirmuar, por duket se situata po rrjedh në mënyrë të tillë, që trajneri durrsak të “tërhiqet” vetë.
Ka një hezitim të drejtuesve të Luftëtarit për ta zgjatur bashkëpunimin me këtë trajner dhe deri tani ka pasur vetëm deklarata diplomatike të tipit “po bisedojmë, Lika është ende trajner”. Përderisa nuk ka lëvizje konkrete për një kontratë të re, do të thotë që te Luftëtari po kërkojnë trajner tjetër, ku më e mundshme është pista e huaj. Koha po limitohet në fakt, sepse Luftëtari duhet të nisë përgatitjet për Europa League dhe duhet të qartësohet sa më shpejt çështja e trajnerit, më pas edhe e përforcimeve. Kuotat e Likës duket sikur pakësohen gjithmonë e më shumë.
Lika në fakt është një trajner shumë popullor në Gjirokastër dhe tifozët e Luftëtarit dëshirojnë qëndrimin e tij, jo thjesht për respekt të suksesit që ka arritur ekipi sezonin e fundit. Edhe specialistë të ndryshëm gjykojnë se trajneri ishte shumë i rëndësishëm në arritjen historike me punën e tij. Por drejtuesit e Luftëtarit vazhdojnë të mbajnë varur këtë çështje, duke mos qenë të bindur për të vazhduar me Likën.
