Rreth 3 m2 është sipërfaqja e gjelbër që i takon çdo qytetari të Gjirokastrës, nga 9 m2 që është norma e pranuar. Vihet re një rritje e sipërfaqes së gjelbër për banor, që lidhet më së shumti me largimin e popullsisë, sesa me mbjelljet e reja.
Megjithatë nëse ritmi i mbjelljeve të këtij viti do të vijojë, me shumë gjasa norma e gjelbërimit mund të shkojë në 4 m2 për banor pas pak vitesh.
Gjirokastra i është bashkuar fushatës kombëtare “Shto O2 tënd”, me pjesëmarrjen e disa institucioneve, organizatave dhe grupimeve qytetare. Sipas nënkryetarit të bashkisë, Vangjel Muço, aksioni primar do të synojë pyllëzimin e shpateve të përrenjve me rrezik të madh rrëshqitjesh.
Brenda muajit mars pritet të mbillen mbi 3000 pemë dhe shkurre dekorative, shumica si kontribut privat i qytetarëve dhe organizatave.
Shpyllëzimi masiv ishte një prej shkaqeve kryesore të rrëshqitjeve në tri lagje të qytetit të Gjirokastrës. Në nivel rrethi dhe qarku, Gjirokastra ka humbur gjatë dekadës së fundit më shumë se 40% të fondit pyjor dhe të brezit të shkurreve, duke kërcënuar habitatet natyrore të faunës.
Pasojat janë duke ndikuar seriozisht edhe zonat e banuara, ndërsa shpyllëzimi i skarpateve të rrugëve ka nxitur shembjet e shpateve dhe problemet në qarkullim sidomos në akset dytësore./ TCh