Gjirokastra është përfshirë nga një situatë e rënduar si pasojë e motit ekstrem dhe reshjeve intensive të shiut, të cilat sipas autoriteteve vendore janë ndër më të fortat e regjistruara ndonjëherë në qytet. Si pasojë, në disa prej lagjeve të poshtme janë regjistruar vërshime inertesh dhe dëme materiale të konsiderueshme.
Kryebashkiaku i Gjirokastrës ka reaguar përmes një mesazhi publik, duke bërë të ditur se të gjitha strukturat bashkiake, mjetet dhe punonjësit janë në terren dhe po punojnë pa ndërprerje për përballimin e situatës dhe normalizimin e gjendjes.
“Fatmirësisht nuk kemi asnjë pasojë në jetë njerëzish, por vetëm dëme materiale në disa banesa, biznese dhe automjete,” – thekson kryebashkiaku, duke shtuar se puna do të vijojë pa ndalim gjatë gjithë natës dhe ditën e nesërme.
Ai u ka bërë apel qytetarëve që të shmangin lëvizjet e panevojshme, si për të garantuar sigurinë e tyre, ashtu edhe për të mos penguar ndërhyrjen e skuadrave të emergjencave që ndodhen në terren.
Në mesazhin e tij, kryebashkiaku ka vënë theksin edhe te solidariteti dhe bashkëpunimi qytetar, duke shprehur bindjen se me kurajo, durim dhe frymë solidariteti, Gjirokastra do ta kalojë edhe këtë situatë të vështirë.
Për çdo emergjencë apo nevojë për ndihmë, qytetarët ftohen të kontaktojnë menjëherë numrin 112, ndërsa situata vijon të monitorohet në mënyrë të vazhdueshme nga autoritetet.
