Thatësira e madhe dhe reduktimi i prurjeve në burimet që furnizojnë me ujë të pijshëm Gjirokastrën, duke i shtuar kësaj edhe gjendjen e amortizuar të rrjetit shpërndarës në njësitë administrative përreth qytetit, po sjellin vështirësi në menaxhimin e situatës së furnizimit me ujë të pijshëm për më shumë se 40 përqind të banorëve të bashkisë.
Kreu i Ndërmarrjes së Ujësjellësit, Bashkim Tola tregon se ndërhyrjet për të përmirësuar pjesën e vjetër të rrjetit kërkojnë investime të mëdha.
“Rrjetet në njësitë administrative lënë për të dëshiruar. Kemi probleme sidomos tek rrjetet e brendshme të shpërndarjes nëpër fshatra”, thotë Tola.
Ndërmarrja ka identifikuar rreth 500 abonentë që nuk e paguanin faturën e ujit të pijshëm, ndërsa ka gjobitur përdoruesit e paligjshëm të rrjetit, si dhe ka ndërprerë 14 ndërhyrje të paligjshme në rrjetin kryesor.
“Të nje pjesë e rrjetit, te pjesa periferi që lidhet me Lazaratin kemi patur probleme, sepse po vazhdojmë me kompletimin me matësa dhe nuk mund ta mbajmë rrjetin 24 orë, ngaqë shfrytëzohet pa kriter nga banorët, për vaditje e të tjera”, deklaron kreu i ujësjellësit të Gjirokastrës.
Ndërmarrja e Ujësjellësit njoftoi gjithashtu vendosjen e shërbimit të informimit mbi defektet, shërbim që qytetarët mund ta përdorin përgjatë 24 orëve.
