Gjirokastra është klasifikuar si një zonë e gjelbër, që përfiton masa të shumta lehtësuese krahasuar me pjesën tjetër të vendit, për shkak se deri më tani nuk ka pasur asnjë rast të konfirmuar me Covid-19. Sot nisi hapja e shumë biznesve dhe u zgjerua fasha orare për lëvizjen e njerëzve. Por baret dhe restorantet vijojnë të jenë ende të mbyllura. Aktualisht punojnë vetëm ato restorante që ofrojnë shërbimin delivery. Në këto biznese janë të punësuar shumë persona.
Do të ishte e udhës që së paku në zonat e klasifikuara si të gjelbërta, siç është edhe Gjirokastra, baret të lejohen të ofrojnë shërbime për qytetarët në një formë tjetër. Kush kërkon të marrë kafe apo pije të tjera, të shkojë në lokal me radhë, po njësoj siç hyn në farmaci apo furrën e bukës. Merr porosinë dhe largohet. Në këtë mënyrë ruhet distancimi social, shmangen grumbullimet e njerëzve dhe nuk penalizohen më tej bizneset. Të mos harrojmë se baret kryesore në Gjirokastër kanë ulur qepenat që prej datës 10 mars.
Më shumë se një muaj pa punë është kosto e lartë për ta. Veç kësaj, së fundi në Gjirokastër është vëne re edhe një fenomen tjetër. Dyqanet që shesin bukë apo pastiçeritë, ofrojnë gjithashtu edhe kafe me gota plastike. Pra, zëvendësojnë lokalet e mbyllura. Në këto kushte derisa kafja ofrohet me gota plastike nga furrat e bukës, pastiçeritë apo dyqane të tjera, më mirë le të hapen lokalet dhe të monitorohen rreptësisht që të mos lejojnë grumbullimin e njerëzve brenda, por të ofrojnë shërbim në një formë të re.
Hyr me radhë, merr porosinë dhe largohu. Ose ose nëse baret kanë vetë mundësi të operojnë përmes shërbimit delivery. Në këtë mënyrë i jepet një lloj frymëmarrje këtyre bizneseve dhe gjenerojnë të ardhura për të mbajtur punëtorë, për të paguar taksat dhe për të kontribuar në ekonominë lokale. Nuk janë këto radhë thirrje për të shkelur masat kufizuese të karantinës dhe as për të favorizuar këto biznese, por është një ide alternative për të dalë nga ngërçi i krijuar prej gati dy muajsh. Aq më tepër kur siç e thamë më herët, kemi të bëjmë me një zonë të gjelbër, ku virulenca e Covid-19 është shumë e ulët. Nuk ka më kuptim mbyllja. Tani duhet të shkojmë drejt hapjes dhe përshtatjes me rregullat e reja.
©argjiroja.net
