Apeli i GJKKO-së ka liruar nga qelia dhëndrin e Sali Berishës, Jamarbër Malltezi, duke caktuar masë sigurie “arrest shtëpie”.jamarber malltezi
Ndërsa për Sali Berishën, togat e zeza kanë lënë në fuqi masën e sigurisë “detyrim paraqitje” dhe bllokimin e pasaportës.
“Siç ju njoftua Gjykata shpalli vendimin, duke e miratuar për pjesën e Zoti Berisha dhe duke ndryshuar për Jamarbër Malltezin, duke caktuar masën sigurimi atë të “arrestit në shtëpi”. Kjo çështje mbetet politike, kjo nuk ka lidhje me thelbin e çështjes. Malltezi nuk ka asgjë lloj penaliteti.
Që kjo çështje është politike. Është e pamundur që për çështje të tilla, brenda një dite punë të dorëzohet kallëzimi dhe të regjistrohet procedimi penal”, tha avokati Genc Gjokutaj në njè deklaratë për mediat.
Sa i përket masën ndaj ish-kryeministrit, Gjokutaj u shpreh: “Ashpërsimi i masave të sigurisë ka të bëjë me rrezikun e ikjes. Berisha nuk ka rrezik që të iki, çdo ditë e keni në media, dy herë në javë në Parlament, ndërkohë që Prokuroria e kërkon një herë në dy javë. Problemi është ligjor, që ajo masë detyrim paraqitje rrjedh nga një proces antikushtetues dhe antiligjor procedurial.”
Njoftimi i Gjykatës:
Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtarja Iliriana Olldashi, sot më 21.11.2023, ora 11:00, shpalli vendimin mbi çështjen penale nr. 56 akti, datë 14.11.2023 regjistrimi, regjistruar mbi ankimin e personave nën hetim S.B. dhe J.M., me objekt: “Ankim ndaj vendimit nr. 112, datë 20.10.2023 të Gjykatës së Posaçme të Shkallës së Parë për Korrupsionin dhe Krimin e Organizuar” që ka disponuar në lëndë të masave të sigurimit personal, dhe vendosi:
Miratimin e vendimit nr. 112, datë 20.11.2023 të Gjykatës së Posaçme të Shkallës së Parë për Korrupsionin dhe Krimin e Organizuar, të verifikuar me vendimin nr. 117, datë 26.11.2023 të së njëjtës gjykatë ndaj ankuesit S.B.
Ndryshimin e vendimit nr. 112, datë 20.11.2023 të Gjykatës së Posaçme të Shkallës së Parë për Korrupsionin dhe Krimin e Organizuar, të verifikuar me vendimin nr. 116, datë 23.11.2023 të së njëjtës gjykatë ndaj ankuesit J.M., si më poshtë:
Caktimin e masës së sigurimit personal me efekt shtrëngues “Arrest në shtëpi” ndaj të hetuarit J.M., duke e urdhëruar atë të mos largohet nga banesa e tij e ndodhur në adresën {…} si dhe të mos komunikojë me persona të tjerë me përjashtim të atyre që banojnë në të njëjtën banesë me të.
Urdhërohet lirimi nga ambientet e paraburgimit it ë hetuarit J.M., në rast se nuk mbahet për ndonjë shkak tjetër.
Urdhërohet Prokuroria e Posaçme kundër Korrupsionit dhe Krimit të Organizuar, policia gjyqësore pranë saj, si dhe policia gjyqësore pranë Drejtorisë Vendore të Policisë Tiranë për ekzekutimin e këtij vendimi dhe kontrollimin e zbatimit të urdhrave të dhëna të hetuarit nga kjo gjykatë.
