Në prag të gjysmëfinales së dytë, ’Eurovision Song Contest 2026’ ka hyrë në fazën më emocionuese, ndërsa Shqipëria vjen me pritshmëri të larta për përfaqësimin e saj. Shqipëria përfaqësohet nga këngëtari Alis Kallaçi me këngën “Nân”, e cila do të interpretohet e 13-ta në renditje mbrëmjen e sotme.
Kënga shqiptare ka marrë vëmendje pozitive pas provave zyrtare në skenën e Eurovizionit, ndërsa mediat ndërkombëtare të festivalit e kanë përfshirë Shqipërinë mes vendeve që mund të surprizojnë në votime.
Si mund të votohet
Unioni Evropian i Transmetimeve (EBU) ka vendosur masa më të forta për votimin, pas kritikave dhe akuzave për manipulime në edicionet e kaluara. Numri maksimal i votave për çdo person është reduktuar në 10.
Mbështetja e diasporës shqiptare konsiderohet vendimtare për kualifikimin e Shqipërisë në finalen e madhe të së shtunës. Votimi për Alis bëhet përmes numrit 13 në vendet pjesëmarrëse të Eurovizionit, sipas kodeve përkatëse të secilit shtet.
Ndërsa shqiptarët që jetojnë në vende jo pjesëmarrëse mund të votojnë online (www.esc.vote) gjatë gjithë ditës së sotme. Ata nuk do të kenë mundësi të votojnë gjatë transmetimit live të spektaklit, por votimi do të rihapet për pak minuta pas performancës së Shqipërisë dhe në përfundim të spektaklit.
Shqipëria synon një vend në finalen e madhe, në një garë që bashkon artistë nga e gjithë Europa dhe më gjerë, duke e kthyer muzikën në një urë lidhëse mes kulturave dhe publikut ndërkombëtar.
