Grigor Tavo ka një version tjetër për ngjarjet e fundit në Gjirokastër. Presidenti i Luftëtarit lë të kuptohet se ka dyshime të forta për ndeshjen me Tiranën, edhe pse refuzon ta thotë publikisht këtë gjë. Në një intervistë ekskluzive për “Panorama Sport”, kreu i klubit gjirokastrit sqaron vendimin për pezullimin e trajnerit Julian Ahmataj dhe dy lojtarëve: Albano Aleksi dhe Xhekson Ferreira.
“Jemi akoma duke e hetuar humbjen 5-3 ndaj Tiranës. Me sa di unë, disa lojtarë kanë firmosur marrëveshje a parakontratë para dy muajsh me Tiranën. Është puna e tyre, pasi në fund të fundit u mbaron kontrata me Luftëtarin. Por, fillimisht duhet të uleshin me ne dhe të dëgjonin ofertën tonë, pasi kanë kaluar nga 4 vite në këtë klub”, thotë Tavo.
Ai shpjegon se e mori vendimin vetëm pas Kukësit, pasi atëherë i erdhën informacionet dhe thekson se nuk është mosmirënjohës, pasi si Milinkoviç, Lika apo edhe Ahmataj, ikën pasi u skadoi kontrata.
Pezulluat trajnerin dhe dy lojtarë pas humbjes në Kupë kundër Tiranës. Pse erdhi ky vendim?
Erdhi prej rezultatit të humbjes së thellë që pësuam në Tiranë. Nuk jemi ekip që të humbasim 5 me 3, pasi kaq gola nuk i kemi pësuar as gjatë gjithë fazës së dytë. Ndaj morëm këtë vendim, duke i pezulluar.
Po pse pikërisht Ahmataj, Xhekson dhe Aleksi dhe jo ndonjë tjetër…?
Ata ishin kryesorët. Ata gabuan.
Nga mënyra si rrodhën ngjarjet, u krijua përshtypja se ju keni pasur hije dyshimi për ndonjë “tolerim” të mundshëm kundër Tiranës. Është e vërtetë?
Nuk mund të flas pa fakte. Jemi në hetimin e çështjes për të zbuluar realitetin dhe besoj se do ta gjejmë atë shumë shpejt. Deri në përfundim të sezonit, do të kemi një pasqyrë më të qartë për atë që është bërë.
Është përfolur se trajneri dhe disa lojtarë janë në planet e Tiranës për merkaton e sezonit e ri. Kanë ndikuar këto zëra në vendimin tuaj?
Plane ka pasur dhe i kam dëgjuar. Madje, vetë drejtuesit e klubit të Tiranës më kanë pyetur edhe mua direkt. Pra, ka pasur interes. Me sa di unë, lojtarët kanë firmosur marrëveshje a parakontratë para dy muajsh. Është puna e tyre, pasi në fund të fundit u mbaron kontrata me Luftëtarin. Por, fillimisht duhet të uleshin me ne dhe të dëgjonin ofertën tonë, pasi kanë kaluar nga 4 vite në këtë klub.
