Gjykata e Selanikut ka dënuar me 13 vjet burg një shtetas shqiptar, që akuzohej se kishte përdhunuar nënën e vet.
Gjykata e ka konsideruar 29 vjeçarin fajtor për akuzën e përdhunimit, por edhe të incestit. Trupi gjykues nuk ka marrë parasysh asnjë rrethanë lehtësuese.
Ngjarja e pazakontë kishte ndodhur në banesën e familjes, në vendin e quajtur Analipsi, në rrethinat e Selanikut.
Denoncimin në polici e kishte bërë vetë nëna, e moshës 58 vjeç. Por duke deponuar në gjyq, me cilësinë e dëshmitares, ajo ka kërkuar të tërheqë padinë, ndërsa ka deklaruar se e ka falur krijesën e vet dhe se është e gatshme që ta mbajë në shtëpi.
Edhe 29 vjeçari kërkoi ndjesë për aktin e dënueshëm, duke thënë se e kishte kryer nën ndikimin e alkoolit. Ai tha se vuante nga një depresion shpirtëror që shprehet në urrejtjen ndaj femrave dhe se këtë e kishte pësuar pas një zhgënjimi erotik, pak vite më parë.
Pas shqiptimit të dënimit, 29 vjeçari u kthye në burg, ku po mbahet që prej tetorit të vitit të kaluar.
