Kryeministri i Greqisë Kyriakos Mitsotakis ka bërë thirrje për zgjedhje të përgjithshme për majin – dy muaj përpara përfundimit të mandatit të qeverisë së tij konservatore në korrik, pasi qeveria e tij përballet me zemërim të gjerë për një fatkeqësi treni që vrau 57 njerëz në shkurt.
Vendi ka parë një seri protestash masive të zemëruara, duke akuzuar qeveritë e njëpasnjëshme për dështimin në adresimin e çështjeve të sigurisë – një trashëgimi e krizës financiare dhjetëvjeçare të Greqisë e cila përfundoi në 2018.
Shumica e viktimave të incidentit ishin studentë të universitetit që ktheheshin nga një fundjavë e gjatë pushimi. Ministri i transportit i Greqisë dha dorëheqjen pas katastrofës, ndërsa drejtori i stacionit në detyrë dhe tre zyrtarë të tjerë hekurudhor janë akuzuar në lidhje me përplasjen dhe përballen me burgim të përjetshëm.
Sindikatat hekurudhore kishin paralajmëruar prej kohësh autoritetet për problemet me rrjetin hekurudhor të Greqisë, duke pretenduar se një dekadë e shkurtimeve të shpenzimeve e kishte lënë atë të pafinancuar, personel të pamjaftueshëm dhe të cenueshëm ndaj aksidenteve.
Shërbimet e trenave në Greqi rifilluan të mërkurën për herë të parë që nga fatkeqësia e muajit të kaluar. Shërbimet e trenave kombëtare dhe periferike rifilluan vetëm përgjatë seksioneve të kufizuara të rrjetit hekurudhor, me staf shtesë të trenave dhe stacioneve dhe pika të detyrueshme të reduktimit të shpejtësisë në zonat ku potenciali për një përplasje konsiderohet më i lartë.
Treni i parë i ditës ishte shërbimi në orën 04:45 të mëngjesit nga Athina në Inoi, 60 kilometra në veri. U rivendos gjithashtu shërbimi hekurudhor periferik nga Athina në aeroportin e saj ndërkombëtar. Shërbimet e plota do të rifillojnë më 11 prill, duke përfshirë transportin hekurudhor midis Athinës dhe qytetit të dytë më të madh të Greqisë, Selanikut.
Përplasja vdekjeprurëse midis një treni pasagjerësh në itinerarin Athinë-Selanik dhe një transportuesi mallrash që po afrohej, nxori në pah problemet e vjetra me sistemet për monitorimin e sigurisë së rrjetit.
