Bypass-i në Tepelenë një nga investimet më të mëdha dhe strategjike të zhvilluara ndonjëherë në qytetin jugor të vendit, është hapur për kalim në një pjesë të tij kur kanë mbetur edhe pak punime për t’u realizuar. I pranishëm në inagurimin e kësaj vepre të rëndësishme infrastrukturore ishte edhe kryeministri Edi Rama. Pas një pune të madhe për më shumë se një vit, bypass-i i Tepelenës, ose ndryshe e quajtur “Ballkoni i Jugut”, sjell një realitet të ri bashkëkohor në transformimin e infrastrukturës në hyrjen dhe daljen e qytetit të Tepelenës.
Ky investim, është në një nga pikat kryesore të rrugës nacionale që lidh rajonin e jugut me kufirin e Greqisë. Vepra infrastrukturore i shton bukurinë dhe rrit standardet urbane, krahas krijimit të mundësive për investime të reja në fushën e turizmit.
Bypassi i Tepelenës është një investim i qeverisë, në vazhdën e projekteve të zhvillimit të infrastrukturës së vendit, që i jep zgjidhje njëherë e përgjithmonë problemeve në këtë pjesë të rrugës me gjatësi 1.8 km, që shpesh ishte burim aksidentesh. Bypass-i i Tepelenës lidh dy segmente të rëndësishme, Levan-Tepelenë dhe Tepelenë-Kakavijë, duke lehtësuar në këtë mënyrë qarkullimin me impakt zhvillimin e ekonomisë së zonës.
