Keqardhje pafund për faktin që dalin “duar bosh” përballë Anglisë, por krenari pafund për një ekip që dha më shumë se 100% për të ndalur “Tre Luanët”. Në fund, në “Air Albania” diferencën e bëri një super yll si Harry Kane, “bomberi” i momentit në Evropë, me sulmuesin e Bayern Munich që realizoi një “dopietë”.
Sigurisht në shifrat, ekipi i Tuchel ishte superior pasi kishin kontrollin e lojës me 70% mbajtjen e topit, krijuan 14 raste, goditën 7 herë kuadratin, ku 3 prej tyre ishin raste të pastra, por në fushë nuk të krijohej kjo përshtypje pasi Arbër Hoxha dhe pjesa tjetër e fazës ofensive të Shqipërisë kërcënuan në më shumë se një herë portën e Anglisë. Tentuam 7 herë kuadratin, 3 prej tyre në portë.
Deri në minutën e 74-ët, përpara se Harry Kane të realizonte golin e parë të gjithë besonim se mund të ndalnim për herë të parë në histori Anglinë, por as këtë herë nuk ishte e thënë, nuk arritën t’i prishnim ecurinë perfekte ekipit të Tuchel.
Nga Anglia tek Anglia, Shqipëria e mbyll këtë fushatë kualifikuese me një humbje, por me besimin e madh se në “play-off” mund të bëjmë mirë, mund të besojmë se në mars asgjë nuk është e pamundur pavarësisht rivalëve që do të kemi përballë.
()
