Një ditë pas aksidentit tragjik në Jorgucat, mësohen detaje të tjera nga grupi hetimor që po merret me ngjarjen e rëndë. ‘Panorama’ shkruan se drejtuesi i mjetit që vinte nga Kakavija, në momentin fatal e kishte zënë gjumi, ndërsa mjeti mori drejtimin lindor të rrugës, duke u përplasur fillimisht me bordurat anësore dhe më pas me gratë, të cilat qëndronin të ulura në bordurë në pritje të mjeteve të rastit, për të shkuar në shtëpi. Goditja ka qenë fatale për 40-vjeçaren Haxho Çela, e cila ka humbur jetën në mënyrë të menjëhershme pas goditjes nga pjesa e djathtë e kofanos së makinës.
38-vjeçarja Sili Krishti ka humbur jetën vetëm pak minuta pasi kishte mbërritur në spitalin e Gjirokastrës, ndërsa Pranvera Gjini fatmirësisht shpëtoi dhe aktualisht ndodhet në spital jashtë rrezikut për jetën. Tri gratë nga Lazarati punonin prej vetëm 20 ditësh në pikën e grumbullimit të bimëve medicinale në Jorgucat. 40-vjeçarja Haxho Çela është nënë e katër fëmijëve, ndërsa 38-vjeçarja Sili Krishti la jetimë dy fëmijë të mitur, më i madhi prej të cilëve në klasën e dytë fillore. Policia ka arrestuar shoferin Leonidha Klemo, 64 vjec, ndërsa vijojnë hetimet nga Prokuroria e Gjirokastrës për zbardhjen e plotë të shkaqeve të ngjarjes së rëndë./Panorama
