Në garën për kreun e PD-së do të mungojë përballje e kandidatëve. Ballafaqimin e vetëm për humbjen Lulzim Basha ka pranuar ta ketë vetëm me anëtarësinë. Gjatë një takimi në Gjirokastër, Basha tha se kundërshtarit tonë nuk i qesh buza sepse e di cfarë ka bërë në këto zgjedhje.
“Dhe unë kam ardhur këtu sot t’ju kërkoj që të dalim jo vetëm të bashkuar por edhe të vendosur për vazhdimin e kësaj beteje. Sikundërse ju kërkoj që të jeni bashkë me mua në vazhdimin e kësaj beteje e cila kërkon lidership të sprovuar dhe të vendosur”, tha Basha.
Pas zgjedhjeve demokratët i pret analiza. Beteja ligjore vijon paralelisht me informimin e ndërkombëtareve.
“Por tani ndodhemi në një fazë e cila diktohet nga statuti, është vendosur nga institucionet e Partisë dhe pa diskutim as nuk mund ti mbivendoset dhe as do të zëvendësojê analizën e plotë të asaj që ka ndodhur në raport me zgjedhjet e 25 prillit. Përkundrazi dje dhe gjatë ditës së sotme ka përfunduar raporti i plotë dhe po përkthehet për tu dërguar kudo si hapi i parë për të avancuar më tej në këtë betejë”, u shpreh kreu i PD-së.
Në turin e takimeve ne Gjirokastër, Përmet dhe Tepelenë, Lulzim Basha mbrojti tezen se zgjedhjet janë vjedhur nga një regjim duke shmangur emrat e autoreve.
“Gjëja e parë që dua t’ju them, është mirënjohja nga shpirti për sakrificën në betejën e pabarabartë me një regjim që nuk la asnjë rregull loje pa shkelur, nuk la krim zgjedhor pa kryer”, tha ai.
