Deputetja e Partisë Demokratike, Ina Zhupa, ngriti sot shqetësimin për menaxhimin e mbetjeve në Sarandë, veçanërisht në prag të sezonit turistik, duke theksuar nevojën për ndërhyrje të menjëhershme dhe masa konkrete.
Gjatë një diskutimi, Zhupa, njëherësh kryetare e Komisionit për Edukimin dhe Mjetet e Informimit Publik, vuri në dukje problematikat aktuale që sipas saj po dëmtojnë imazhin e qytetit.
Ajo theksoi se mbetjet e qytetit transportohen drejt landfillit të Bajkajt në Delvinë “me mjete të amortizuara që ndotin më shumë sesa pastrojnë”, ndërsa shton se gjatë verës situata rëndohet ndjeshëm për shkak të fluksit turistik.
“Gjatë sezonit veror, qyteti përballet me një rritje deri në pesëfish të popullsisë, por menaxhimi i mbetjeve mbetet i njëjtë” u shpreh deputetja.
Sipas saj, pamjet e koshave të tejmbushur dhe grumbullimeve të mbetjeve janë kthyer në një problem serioz.
“Kosha të tejmbushur në mes të ditës, grumbullime spontane mbetjesh në Ksamil dhe në gjithë qarkun, imazhe që bëhen virale dhe dëmtojnë rëndë reputacionin tonë”, shkruan ajo.
Zhupa paralajmëroi se kjo situatë ndikon drejtpërdrejt në turizëm dhe perceptimin e vizitorëve.
“Turistët zgjedhin destinacione të pastra. Një qytet me mbetje në rrugë krijon menjëherë perceptimin e mungesës së standardeve. Imazhi në rrjetet sociale është vendimtar. Një foto me plehra shpërndahet më shpejt se çdo reklamë pozitive”, nënvizoi Zhupa.
Ajo propozoi një sërë masash për përmirësimin e situatës, duke përfshirë, “menaxhim të diferencuar të mbetjeve, shtim të ndihmës dhe fondeve nga qeveria gjatë sezonit turistik, investim real në riciklim dhe ndarje në burim, si dhe modernizim të flotës së pastrimit”.
