Tifozët polakë po e përjetojnë me optimizëm pragndeshjen ndaj Shqipërisë, të vlefshme për play-off të Botërorit 2026. Por disa ikona të futbollit vendas, paralajmërojnë gjithnjë e më shumë se ndaj kuqezinjve duhet kujdes maksimal, pasi ekziston mundësia e një surprize.
Këtë e mbështetet edhe Marek Kozminski, një nga ikonat e futbollit polak me 45 ndeshje me përfaqësuesen, i cili në një intervistë të dhënë për “SportoweFakty”, ka theksuar se tifozët duhet të jenë me këmbë në tokë.
“Nuk jam aq optimist, ndonëse besoj tek kjo skuadër. Por ia vlen të ruhet logjika e shëndoshë në të gjitha gjërat. Vlen të përmendet se kemi një ekip mjaft të pabarabartë. Kemi Robert Levandovskin, Piotr Zielinskin, Meti Kesh dhe dy qendërmbrojtës, Jan Bednarek dhe Jakub Kivior. Këto janë pikat e forta, sepse nuk po e llogaris Nikola Zalevskin për momentin, pasi ai është i pezulluar për ndeshjen kundër Shqipërisë për shkak të kartonëve të verdhë. Pra, sot, mund të mbledhim më pak se gjysmën e një ekipi me pika të tilla të forta dhe të besueshme.
Ndërkohë, Shqipëria ka një ekip shumë të ekuilibruar. Pa yje si ne, por prapëseprapë shumë cilësor. Kombëtarja polake varet shumë nga lojtarët individualë, veçanërisht Zielinski dhe Levandovski, për të luajtur mirë. Për më tepër, imagjinoni që një nga qendërmbrojtësit e lartpërmendur të largohet nga skuadra për shkak të lëndimit ose pezullimeve, dhe ne jemi menjëherë në telashe serioze.
Prandaj, na duhen disa lojtarë të tjerë, përtej liderëve, që të ngrihen në lartësinë e situatës, të performojnë në maksimumin e tyre dhe atëherë do të jemi një kërcënim për cilindo nga këta tre kundërshtarë. Sepse besoj se ne, si ekip, kemi potencial më të madh futbollistik se Shqipëria, por edhe më të madh se Suedia apo Ukraina”, tha Kozminski i cili pjesën më të madhe të karrierës së tij e ka kaluar në futbollin italian, ku ka luajtur me klubet e Udinezes dhe Breshias.
