Luftëtari heq dorë nga të huajt dhe më në fund i beson një shqiptari pankinën. Hasan Lika është trajneri i ri i gjirokastritëve, teksa sot do të bëjë prezantimin para skuadrës, për të nisur menjëherë punën. Presidenti Grigor Tavo ia ka besuar 57- vjeçarit nga kryeqyteti, nisur nga eksperienca e madhe që ai ka me klubet e Kategorisë Superiore.
Lika ka drejtuar ndër vite Partizanin, Teutën, Apoloninë dhe Kukësin. Gjithashtu ai ka qenë në krye të Kombëtares U-21 afro 16 vite më parë. “Po, mund të më uroni. Jam trajneri i ri i Luftëtarit. Falënderoj drejtuesit për besimin. Nuk mund të refuzoja një ekip me grup të mirë lojtarësh që jep garanci”, ka thënë ndër të tjera Lika gjatë një interviste për “Panorama Sport” menjëherë pas emërimit në stol.
Zoti Lika, çfarë ju bindi të merrnit drejtimin e Luftëtarit në këtë situatë jo të mirë që po kalon?
Luftëtari është një skuadër e mirë dhe mendoj se është kënaqësi të punosh. Duke parë grupin e lojtarëve që ka, nuk mund të refuzoja ofertën e drejtuesve. Vërtet ndoshta po kalon një situatë jo komode sa u përket rezultateve dhe lojës, por unë jam i bindur që do të rikthejmë atë Luftëtar që janë mësuar të shohin të gjithë. Shumë shpejt ekipi do të jetë aty ku duhet, si në lojë dhe rezultate.
Çfarë garancie keni marrë nga drejtuesit?
Kam biseduar me drejtuesit dhe natyrisht me mbështetjen në idetë që kisha. Luftëtari e ka grupin dhe në janar thjesht mund të bëjmë ndonjë lëvizje të vogël. Nuk mendoj se kemi nevoja të mëdha për të bërë ndryshime të shumta në merkaton e janarit. Presidenti më ka garantuar se në pjesën e dytë të sezonit do të kemi gati edhe sulmuesin Vasil Shkurtaj, vlerat e të cilit dihen. Gjithsesi, duke njohur më mirë skuadrën në vazhdimësi, do të kemi edhe ide më konkrete për vazhdimësinë.
Do të debutoni me Kukësin. Ndoshta nuk e donit një kundërshtar kaq të fortë që në start?
Jo, nuk mendoj kështu. Të gjitha skuadrat të forta janë. Natyrisht Kukësi është kampione në fuqi dhe në javët e fundit ka pasur rritje si në lojë dhe rezultat.
Si për ironi të fatit do të keni përballë edhe një trajner si Mlladen Milinkoviç, i cili e njeh më mirë se kushdo grupin e lojtarëve të Luftëtarit…
Kjo ka ato anët pozitive dhe negative. Sigurisht Milinkoviç ka punuar mirë në Gjirokastër, duke qenë i suksesshëm në sezonin e kaluar. Për këtë ka një meritë të madhe, por tani nuk është më trajner i Luftëtarit.
A ka diçka që do të ndryshoni menjëherë në skuadër? Ndeshjen e fundit me Partizanin e ndoqa nga stadiumi. Në pjesën e dytë skuadra më pëlqeu, pasi pati momente shumë të mira. Do të kërkoj të përmirësoj aspektin e lojës, për t’u rritur nga ndeshja në ndeshje.
Ndaj Kukësit do t’ju kënaqte edhe një pikë apo doni vetëm fitore?
Unë shpresoj se do ta nisim me një fitore të shtunën.
