Presidenti i Federatës Shqiptare të Futbollit, Armand Duka, në intervistën e dhënë për Sport News në News 24, u pyet edhe për jetën e përditshme. Duka foli për kohën e lirë dhe pushimet, ndërsa nuk mund të liheshin pa përmendur edhe thashethemet e shumta për kreun e FSHF-së.
Tani jemi në barin e FSHF-s, për të zhvilluar një bisedë më soft. Tani të gjithë janë me mendje te pushimet. Jam kurioze të di, ku i bën pushimet presidenti i FSHF-s, brenda apo jashtë Shqipërisë?
I bëj në përgjithësi në Shqipëri, në det.
Në jaht apo në plazhe publike, pra me njerëz afër?
Në det, në përgjithësi.
Në plazhe unë shoh gjyshër që mbajnë nipërit dhe prindërit bëjnë plazh. Po ju z.Duka bëni pjesë te kjo kategori?
Kam shumë dëshirë që t’i kem me vete, këtë vit nuk e kam fatin, se mami i vet nuk na le.
Me kaq shumë angazhime, keni kohë për familje? Si arrin të gjenin balancat, duket sikur jetoni mes Londrës dhe Shqipërisë?
Mendoj se e menaxhoj mjaftueshëm mirë, për të qenë 60 përqind familjar i mirë.
Ku e shihni veten në të ardhmen?
Pasi të mbaroj detyrën e Federatës, uroj që të kem pastaj, jo pushim, sepse vetë jeta ime nuk më lejon që të kem kohë të lirë, merrem me biznes.
Në Shqipëri njerëzit merren me thashetheme. Psh cili ka qenë thashethemi më absurd për ju?
Dëgjoj sa të duash, rreth meje, në lidhje me biznesin, futbollin.
Kur i lexoni komentet online që thonë “Duka s’ka për të ikur kurrë”, a qeshni apo mërziteni?
Në fakt, marrëdhënien me veten time e shikoj në dy botë. Njerëz në rrjete sociale që çfarë nuk thonë, njerëz që takoj në rrugë dhe ambiente sportive. Nuk e di se kush është e vërteta.
A është më e vështirë të menaxhosh një ndeshje të rëndësishme të Shqipërisë apo një darkë me drejtues politikë në të njëjtën tavolinë?
Ajo që është shumë e vështirë është që të menaxhosh emocionet e nivelit të lartë.
Sa e vështirë është të thuash “jo” në pozicionin që keni? Dhe a e përdorni shpesh atë fjalë në takime zyrtare?
Detyrimisht e them.
Nëse një ditë do të linit punën dhe do kishit kohë të lirë, çfarë do bënit të parën? Apo do zhdukeshit?
Në asnjë kohë nuk do zhdukem për sa kohë të kem mundësi të jem aktiv. E thashë, nëse nuk do jem aktiv në futboll, do jem në biznes. Të falenderoj për intervistën dhe të uroj pushime të mbara.
(J.S/BalkanWeb)
