Një influencuese e njohur në rrjetet sociale ka humbur jetën pas një incidenti tragjik në Londrën qendrore, në orët e para të së dielës, më 19 prill, pranë një klubi nate në zonën Soho, por ngjarja u bë më vonë me dije.
Viktima, Klaudia Zakrzeëska, 32 vjeç, nga Essex, dyshohet se është përplasur nga një automjet në Rrugën Argyll. Ajo u transportua menjëherë në spital në gjendje të rëndë, por pavarësisht ndërhyrjes së mjekëve, u shpall e vdekur disa ditë më vonë.
Ngjarja ka tronditur ndjekësit e saj në rrjetet sociale, ku ajo njihej me emrin “Klaudiaglam” dhe kishte një komunitet të gjerë në platforma si TikTok dhe Instagram.
Sipas autoriteteve britanike, për ngjarjen fillimisht u arrestua Gabrielle Precious Carrington, 29 vjeç, ish-finalist i “X Factor”, i cili u akuzua për tentativë vrasjeje. Megjithatë, Policia Metropolitane ka konfirmuar më vonë se akuza është ndryshuar dhe tashmë çështja po hetohet si vrasje.
Hetimet paraprake po përqendrohen në rrethanat e aksidentit dhe dinamikën e ngjarjes jashtë klubit të natës, ndërsa policia po mbledh dëshmi nga dëshmitarët dhe kamerat e sigurisë në zonë.
Rasti ka shkaktuar reagime të shumta në rrjet, ku ndjekësit dhe personazhe të njohur kanë shprehur tronditje dhe ngushëllime për humbjen e influencueses së re. Autoritetet britanike vijojnë hetimet për të zbardhur plotësisht ngjarjen dhe përgjegjësinë ligjore në këtë rast tragjik që ka tërhequr vëmendje të gjerë publike.
