Ish-kreu i PD-së në Gjirokastër, Roland Bejko, shprehet kundër vendimit të Kryesisë së kësaj partie për përjashtimin e deputetit Myslim Murrizi, pasi ky i fundit refuzoi të digjte mandatin. Deklaratat Bejko i bëri gjatë një interviste në Top Channel. Kundër ai u shpreh gjithashtu edhe për një përjashtim të mundshëm të Rudina Hajdarit, e cila nuk e ka dorëzuar mandatin. Duket se qëndrimi i tij kundër Lulzim Bashës sa po vjen dhe po ashpërsohet.
“Unë nuk jam dakord me përjashtimin e zonjës Hajdari. Mendoj se është bërë gabim edhe me përjashtimin e zotit Murrizi. Por e justifikoj në një farë mënyre duke u nisur nga rrethanat dhe kohën e shkurtër kur o mor vendimi. Kryetari Lulzim Basha për hir të së vërtetës e ka thënë se sa të jem unë kryetar nuk do të ketë përjashtime nga partia”, tha Bejko.
I pyetur nga gazetari nëse kishte frikë se mos edhe ai përjashtohej nga PD-ja për shkak të këtij qëndrimi që po mban linjës zyrtare, Bejko dha këtë përgjigje.
“Liria e shprehjes është e garantuar. Unë e kam firmosur deklaratën, kështu që jam brenda qëndrimit të Partisë Demokratike. Nëse do të kisha një arsye për të shkuar në Parlament, përtej qëndrimit të grupit, do t’i bëja ato publike dhe natyrisht do të ishin parimore”, u shpreh ish-kreu i PD Gjirokastër.
Roland Bejko është i dyti në listën e qarkut Gjirokastër. Në zgjedhjet e vitit 2017 ai nuk arriti të zgjidhej deputet. Mandatin e vetëm në këtë qark e mori Tritan Shehu, një politikan i vjetëruar që Basha vendosi ta riciklonte duke shkaktuar jo pak habi edhe në radhët e vetë demokratëve.
©argjiroja.net
