Ish-presidenti i Brazilit, Jair Bolsonaro, i është nënshtruar një ndërhyrjeje kirurgjikale për bllokimin e nervit frenik, në përpjekje për të trajtuar një problem shëndetësor të pazakontë, por tejet shqetësues: lemzën e vazhdueshme që e ka shoqëruar prej muajsh.
Lajmi u bë i ditur nga bashkëshortja e tij, Michelle Bolsonaro, përmes një postimi në rrjetet sociale, ku ajo sqaroi se ish-presidenti ka kaluar nëntë muaj me vështirësi të përditshme për shkak të këtij problemi. “Kanë qenë 9 muaj me siklet dhe vështirësi të vazhdueshme nga lemza e përditshme”, shkroi ajo, duke shtuar se ndërhyrja e parë ka rezultuar e suksesshme.
Sipas mjekëve që ndjekin gjendjen e tij shëndetësore, të shtunën është kryer bllokimi i nervit frenik të djathtë, ndërsa një ndërhyrje e dytë është planifikuar brenda 48 orëve për të bllokuar edhe nervin e majtë. Nervi frenik është një nga nervat kryesorë në zonën e qafës, i cili kontrollon diafragmën muskulin kryesor përgjegjës për frymëmarrjen – dhe çrregullimet e tij mund të shkaktojnë lemzë kronike.
Bolsonaro, 70 vjeç, ishte shtruar në spital që të mërkurën, fillimisht për një ndërhyrje të lidhur me hernien. Mjekët kanë bërë të ditur se operacioni për bllokimin e nervit ka shkuar mirë dhe se gjendja e tij po monitorohet nga afër.
Ndërhyrja u krye me autorizim të posaçëm, pasi në shtator ish-presidenti u dënua me 27 vite burg, lidhur me akuzat për komplot pas humbjes së zgjedhjeve presidenciale të vitit 2022. Me kërkesë të avokatëve mbrojtës, Supreme Federal Court of Brazil i dha leje për të kryer trajtimin mjekësor të nevojshëm.
Gjatë qëndrimit të tij në spital, Bolsonaro publikoi gjithashtu një deklaratë politike, ku shprehu mbështetjen për fushatën presidenciale të të birit, Flavio Bolsonaro, për zgjedhjet e vitit 2026. Pas përfundimit të trajtimit dhe daljes nga spitali, ai pritet të rikthehet në burg për të vuajtur dënimin.
Jair Bolsonaro ka pasur një histori të gjatë problemesh shëndetësore, sidomos pas sulmit me thikë që pësoi gjatë fushatës elektorale në vitin 2018. Që nga ajo kohë, ai i është nënshtruar disa ndërhyrjeve kirurgjikale dhe ka pasur periudha të shpeshta shtrimi në spital, duke e mbajtur shpesh në vëmendjen e mediave jo vetëm për zhvillimet politike, por edhe për gjendjen e tij shëndetësore.
