Mbledhja e sotme e Këshillit Bashkiak të Gjirokastrës është shoqëruar sërish me tensione. Protagonistë ishin dy këshilltarët; Petrit Brahimi i PS-së dhe Dasho Aliko i PD-së, të cilët kanë edhe lidhje farefisnie me njëri-tjetrin, janë kushërinj. Përplasja verbale mes tyre lindi pasi Petrit Brahimi në nisje të fjalës së tij foli për ‘vendosje të ligjshmërisë në Këshillin Bashkiak’, duke iu referuar kështu marrjes së detyrës nga Vjollca Koko. Këtu ndërhyn Dasho Aliko, i cili i drejtohet me fjalët ‘bëni mbledhjet skutave ju…’, duke iu referuar mbledhjes së veçantë të Këshillit Bashkiak, ku u shkarkua Mimoza Çomo dhe u zgjodh Vjollca Koko. Më pas debati ka vijuar me tone të larta dhe fyerje. Kjo nuk është hera e parë që dy kushërinjtë zihen me njëri-tjetrin në Këshillin Bashkiak të Gjirokastrës. Përplasje edhe më e ashpër mes Dasho Alikos dhe Petrit Brahimit, madje duke u gjuajtur me shishe uji, ka ndodhur në tetor të vitit 2016. Shihni pamjet e ‘sherrit’ të sotëm.
© ArgjiroLajm.net
