Miliarderi amerikan Jeff Bezos raportohet se mund të jetë drejt shitjes së megajahtit të tij luksoze “Koru”, një nga mjetet më të shtrenjta në botë, me një vlerë të përafërt prej 460 milionë eurosh.
Sipas raportimeve të Page Six, një burim pranë Bezos ka bërë të ditur se arsyeja kryesore lidhet me përmasat e mëdha të jahtit dhe vështirësitë në menaxhimin e tij. “Koru”, i cili shoqërohet nga jahti ndihmës “Abeona” me vlerë rreth 69 milionë euro, përbën një nga investimet më ekstravagante të themeluesit të Amazon.
Mirëmbajtja e përbashkët e dy mjeteve arrin në rreth 27.6 milionë euro në vit, duke e bërë atë një ndër asetet më të kushtueshme për t’u mbajtur. Përveç kostos, burimet theksojnë se jahti është bërë tepër i dallueshëm për Bezos, edhe për shkak të detajeve unike si figura prej druri në pjesën ballore, që besohet të përfaqësojë partneren e tij, Lauren Sánchez, në formë sirene.
Dizajni i “Koru” është frymëzuar nga jahti “Eos”, në pronësi të miliarderit Barry Diller, por në përmasa shumë më të mëdha, çka ka sjellë sfida logjistike. Në vitin 2023, The New York Times raportoi se jahti nuk mund të ankorohej në Everglades, në Florida, për shkak të dimensioneve të tij.
Megjithatë, “Koru” mbetet simbol i luksit ekstrem, me pishinë me fund xhami, tre xhakuzi, helikopter-port dhe një ekuipazh prej 36 personash, duke akomoduar deri në 18 mysafirë. Në bord kanë qenë të ftuar edhe emra të njohur si Oprah Winfrey, Kim Kardashian dhe Leonardo DiCaprio.
