Rruga në zonën e Arrës së Gurrës, në Librazhd, nuk u hap as këtë të hënë siç ishte paralajmëruar.
Autoriteti Rrugor Shqiptar njoftoi se segmenti ka pësuar dëmtime dhe fundosje, ndërsa edhe rruga provizore është prekur nga rrëshqitjet e dherave. Për pasojë, aksi mbetet i pakalueshëm.
Situata ka krijuar probleme edhe në rrjetin energjetik. OST bëri me dije se rrezikohet një shtyllë e linjës 110 kV dhe për këtë arsye do të ndërhyhet për demontimin e saj. Gjatë punimeve do të ketë ndërprerje të energjisë në disa zona të Librazhdit.
Nga terreni, drejtori i ARRSH-së, Ami Kozeli, tha se reshjet e shumta dhe erozioni i lumit kanë ndikuar në destabilizimin e zonës.
“Situatë kritike. Ajo që ne shpresuam se ishte një plan rrëshqitjeje në 6 metra nuk rezultoi e tillë. Rrëshqitjet janë aktive. Masat e marra me Bypass dhe rrugë unaze sekondare nuk rezultuan efektive dhe aksi do të vijojë të mbetet i bllokuar. Po diskutohet të bëhet një rrugë alternative. Njëra prej mundësive është Spathari ose rrugë alternative në Dragostunjë”, ka thënë Kozeli.
Punimet për stabilizimin e terrenit vijojnë, ndërsa hapja e rrugës do të varet nga ecuria e ndërhyrjeve dhe kushtet atmosferike.
