Fitorja ndaj Dinamos në transfertë theu më në fund tabunë e këtij sezoni për Egnatian, e cila arriti të mposhtë një prej rivalëve direktë të “Final 4”, diçka që nuk kishte ndodhur asnjëherë deri më tani. Një ngërç i fortë moral u kalua me sukses dhe tashmë rrogozhinasit kanë mundësinë reale të “gjuajnë” vendin e parë, aty ku aktualisht i paraprin Elbasani me vetëm një pikë më shumë.
Pas kalimit me sukses të testit të vështirë në kryeqytet, në Rrogozhinë tani janë plotësisht të fokusuar te ndeshja e radhës në shtëpi, ajo ndaj një tjetër kryeqytetaseje, Partizanit, që vjen pas një ecurie pozitive në javët e fundit. Sakaq, në kampin e kampionëve duan të mos ulin aspak ritmin dhe të koleksionojnë tri pikët e radhës, për të mbajtur presionin maksimal mbi rivalët direktë për kreun. Në këto 16 javë kampionat vihet re një balancë interesante në paraqitjet e skuadrës së drejtuar nga Edlir Tetova, sa i përket ndeshjeve në shtëpi dhe atyre në transfertë, madje me një dominim të lehtë jashtë fushe. Ky është një tregues i qartë se Egnatia po ecën në rrugën e duhur për të tentuar realizimin e “tris”-it historik, duke konfirmuar statusin e saj si skuadër kampione.
NDESHJET PRITËSE
Egnatia është një nga ekipet që ndeshjet në shtëpinë e saj nuk i ka pasur armën më të fortë këtë sezon. Kjo duket edhe nga statistikat, pasi bardhëjeshilët renditen të katërtit mes rivalëve direktë në këtë aspekt.
Ata janë pas Vllaznisë dhe Elbasanit, ndërsa kanë pikë të barabarta me Dinamon, me nga 15 pikë të grumbulluara në “Arena Egnatia”. Bilanci i tyre përfshin katër fitore, tre barazime dhe një humbje, pikërisht ajo ndaj Flamurtarit. Megjithatë, pavarësisht se shtëpia nuk ka qenë fortesa më e pathyeshme, në kampin kampion janë të vendosur të mos bëjnë asnjë hap fals këtë javë ndaj Partizanit, duke synuar me çdo kusht tri pikët.
NDESHJET UDHËTUESE
Një panoramë krejtësisht tjetër paraqitet në ndeshjet jashtë fushe. Pikërisht aty ku rrogozhinasit bëjnë diferencën dhe tregojnë vlerat e një skuadre kampione. Egnatia mban vendin e parë në klasifikimin e ndeshjeve si udhëtuese, ku në tetë javë ka grumbulluar 16 pikë. Bilanci është pesë fitore, një barazim dhe dy humbje. Ata lënë pas Elbasanin me një pikë më pak, ndërsa rivalët e tjerë janë ndjeshëm më mbrapa. Me pak fjalë, ekipi i drejtuar nga Edlir Tetova shfaqet më i fortë jashtë fushe, duke numëruar madje një pikë më shumë sesa në ndeshjet në shtëpi, çka e bën Egnatian një pretendente serioze për çdo objektiv këtë sezon.
