Sot ka nisur në qarkun Gjirokastër procesi i përzgjedhjes në fazën e parë të kandidatëve që duan të drejtojnë Partinë Socialiste në 7 degët e bashkive të këtij qarku. Mësohet se sot ky proces është realizuar në Memaliaj e Tepelenë, Këlcyrë e Përmet. Nesër në mëngjes e ka radhën Gjirokastra, pastaj Libohova dhe në fund Dropulli. Edhe pse pritej që në këto dëgjesa të merrte pjesë edhe kryeministri Rama, mësohet se ai nuk do të jetë i pranishëm. Kandidatët që kanë aplikuar prezantojnë para Asamblesë së Zgjeruar të bashkisë platformën e tyre.
Të pranishëm janë edhe anëtarë të Komisionit të Posaçëm i përbërë nga anëtarë të Kryesisë së PS. Komisioni i Posaçëm, i kryesuar nga drejtuesi politik i qarkut, Mirela Kumbaro për qarkun Gjirokastër, pas përfundimit të dëgjesave, miraton listën e kandidatëve përfundimtarë dhe ia paraqet Kryesisë së Partisë, së bashku me vlerësimin e kandidaturave dhe një informacion për procesin e zhvilluar.
Sipas rastit, kur gjykohet e nevojshme, Komisioni i Posaçëm mund t’i propozojë Kryesisë skemën e drejtimit me bashkëkryetarë (një burrë/një grua). Në fund është kryesia e PS që miraton kryetarin fitues të secilës bashki. Këto janë zgjedhjet e para që kryetarët e rinj të PS nuk votohen sipas parimit një anëtar një votë. Për Gjirokastrën si bashkia më e madhe qendër qarku kandidojnë 6 persona: Magdalena Margariti, Irida Hoxha, Mihare Lapaj, Ilir Metaj, Ibrahim Kuka dhe kryetari aktual Gentian Llogo. ©argjiroja.net