Partia Socialiste vazhdon të konfigurojë listat e saj të deputetëve në prag të zgjedhjeve parlamentare të 18 qershorit. Pas emërimit të të deleguarve në 12 qarqe, ose ata që mund të quhen kryesuesit e listës së deputetëve, PS ka vazhduar me të tjera lëvizje deputetësh në qarqe të ndryshme. Por duke mbetur te Gjirokastra, qarku që nxjerr 5 deputetë, kandidaturat e sigurta të PS-së deri më tani janë dy ministrat e kabinetit “Rama”, Bledi Çuçi dhe Mirela Kumbaro.
Prej kohësh këta të dy kanë intensifikuar takimet me qytetarët në jug të vendit dhe janë praktikisht në fushatë. Në vend të tretë të listës së socialistëve gjasat janë që kandidat të jetë Flamur Bime, ish-kryebashkiaku i Gjirokastrës për më shumë se 10 vjet. Pas zgjedhjeve të 2015 Bime u emërua në postin e Prefektit të Gjirokastrës, detyrë që e mban ende edhe sot.
Futja e Bimës në listën e kandidatëve për deputetë ngjan të jetë një lëvizje strategjike e Edi Ramës, për të maksimizuar votat për socialistët në Gjirokastër, pasi duke qenë i treti në listë, ish-kryebashkiaku do duhet të punojë fort për të marrë mandatin.
Por kandidimi i Bimes mund të ketë edhe efekt negativ për socialistët, nëse kemi parasysh edhe padinë që IKMT i bëri në prag të zgjedhjeve të vitit 2015 për një ndërtim në lagjen “18 Shtatori” apo edhe konsumin natyral prej të qenit në pushtet për një kohë të gjatë. I katërti në listë ka gjasa të jetë sërish Dashamir Kamberi, aktualisht deputet i Tepelenës.
Mësohet se ai po lobon fort përmes Gramoz Ruçit për të siguruar një vend në listën e PS-së. Sa i përket vendit të pestë, ka shumë emra që përfliten, por deri më tani askush nuk është shumë pranë kandidimit. E sigurt është që Vladimir Kosta, deputeti i Përmetit, ka pak gjasa të kandidohet sërish nga Rama në këtë zonë.
Ndonëse ai ka hedhur shpesh akuza ndaj kryeministrit, zërat thonë se Kosta do të jetë në listat e kandidatëve të Tiranës. Megjithatë ka ende kohë deri në zyrtarizimin e listës dhe surprizat nuk përjashtohen, sidomos për vendin e tretë, të katërt dhe të pestë të listës. Nga zgjedhjet e vitit 2013, deputetët të këtij qarku kanë qënë Erion Veliaj, Arben Ahmetaj, Anastas Angjeli, Dashamir Kamberi, Vladimir Kosta./ArgjiroLajm.net
