Kandidati i OMONIA-s për Bashkinë Himarë, Petro Gjikuria, në takimin hapës të fushatës së tij një ditë më parë, mes të tjerash iu përgjigj edhe atyre që e akuzojnë si “ekstremist” meqë është anëtar i Federatës Panepirote. Për t’i kundërshtuar këto zëra, Gjikuria tha se ai ka bërë dhurata përmes kësaj federate në Greqi dhe Shqipëri duke përmendur këtu Gjirokastrën.
“Kemi ndihmuar shkollën publike të Gjirokastrës. Na kërkuan për të rregulluar çatinë se kur binte shi hynte i gjithë brenda. I dërguam një donacion dhe e rregulluam çatinë. Vitin tjetër na kërkuan prapë për të shtruar fushën ku luanin, ia dërguam prapë donacion. Vitin e tretë na kërkuan prapë që t’ju dërgonim printer se u prish printeri. Ia dërguam prapë. Po të shkojë ndonjëri në azilin e Gjirokastrës do të shikoni një televizor në holl se nuk kishin. Na e kërkuan të moshuarit se nuk kishin. Ngjitur në televizor ka një pankartë ku shkruan “donacion nga Federata Panepirotike”. Këto gjëra bën Federata Panepirote, i ndihmon të gjithë”, tha Gjikuria.
Natyrisht që një filantrop i madh siç ai nxitoi ta quante veten me arrogancë, nuk e ka për zakon t’i përmendë ato që ka bërë. Pastaj kur mburresh se ke çuar një printer në shkollë apo një televizor në shtëpinë e të moshuarve dhe këtë ta “bërtasësh” në mexhelis si akti më i jashtëzakonshëm që ke bërë, kjo është për për të qeshur. Të vegjël si njerëz me siguri janë edhe ata që “e kanë bërë faqen shollë” për një televizor apo një printer, a thua se sot është Shqipëria e vitit 1990 dhe këto pajisje nuk i siguron dot përmes buxheteve që kanë institucionet tona. Kush i ka lypur këto pajisje le të dalë tani t’i japë xhevap Petros dhe qytetarëve se si qëndron e vërteta. ©Argjiroja.net
