Kandidatja e socialistëve në Përmet, Kjara Adhami, ka bërë një reagim të parë pas zyrtarizimit në listën e qarkut Gjirokastër. Ajo thotë në Facebook se nuk i ka hyrë këtij angazhimi për t’u bërë medoemos politikane, por do që përmes politikës të bëjë më të mirën për qarkun Gjirokastër dhe për Përmetin.
Deklarata e plotë:
Mesazhin e parë të këtij angazhimi të ri që është veçse fillimi i një rrugëtimi të gjatë e të përbashkët, dua ta nis me falenderime. Jo për konformitet tradite siç mund të mendojë dikush apo për të qenë “politikisht korrekt”, por për t’i shprehur mirënjohjen atyre që besuan te unë. Së pari, Partisë Socialiste që më përzgjodhi mes rreth 1500 aplikantëve në platformën “Deputeti që Duam”. Dhe së dyti drejtuesit politik në qarkun Gjirokastër, Bledi Çuçi për mbështetjen e madhe dhe mundësinë që më dha të isha pjesë e skuadrës së tij fantastike. Nuk jam në këtë angazhim për t’u bërë medoemos politikane, por dua që përmes politikës të bëj më të mirën për qarkun Gjirokastër dhe për vendin tim të origjinës, Përmetin. Ditë pas dite deri më 25 prill nuk do të rresht së kërkuari besimin tuaj, me fjalë dhe me zemër të hapur, për të votuar të vetmen të mirë që ka sot politika shqiptare, Partinë Socialiste.